Tərtər rayon prokurorluğundan "bizimaz.az"a bildirilib ki, 18 fevral 2022-ci ildə rayonun Çaylı kəndi ərazisində təmir işləri aparan zaman Azərbaycan Avtomobil Yolları Dövlət Agentliyinin əməkdaşları 1963-cü il təvəllüdlü Alışah Səfərov və 1965-ci il təvəllüdlü Faiq Səfərov mina partlayışı nəticəsində müxtəlif dərəcəli bədən xəsarətləri alıblar.

Prokurorluq əməkdaşları tərəfindən hadisə yerinə baxış keçirilib, məhkəmə-tibb ekspertizası təyin edilib.

Faktla bağlı araşdırma aparılır.

Ermənistan Xarici İşlər Nazirliyinin Azərbaycan SSR-in Dağlıq Qarabağ Muxtar Vilayətinin (DQMV) radikal ermənilərinin aqressiv separatçılığının əsasını qoyan 20 fevral 1988-ci il tarixli qeyri-qanuni qərarını dəstəkləyən bəyanatı qətiyyətlə qınayırıq.

Bu barədə Azərbaycan Xarici İşlər Nazirliyinin bəyanatında qeyd olunur.

XİN bildirib ki, sözügedən qondarma qərar SSRİ Konstitusiyasına, DQMV haqqında 1981-ci il Qanununa, habelə bütün digər müvafiq normativ hüquqi aktlara ziddiyyət təşkil edib.

“Ermənistanın aqressiv erməni separatçılarını dəstəkləməsi və Azərbaycana qarşı ərazi iddialarından çıxış edərək təcavüzkar siyasət həyata keçirməsi Azərbaycanın ərazilərinin bir hissəsinin 30 ilə yaxın hərbi işğal altında qalmasına, bu torpaqlarda qanlı etnik təmizləməyə, bir milyon azərbaycanlının fundamental hüquqlarının pozulmasına səbəb olub”, - deyə Azərbaycan XİN-in bəyanatında göstərilib.

Bildirilib ki, Ermənistan XİN-in “dirçəliş” kimi qiymətləndirdiyi aqressiv separatçılıq bölgədə onilliklər ərzində davam edən geniş miqyaslı fəlakətə gətirib çıxarıb.

Bu vəziyyət bölgənin uzun illər ərzində sülh və təhlükəsizlik şəraitində inkişafına ciddi əngəl törədib:

“Hazırda bölgədə beynəlxalq hüququn bərqərar olduğu və iki dövlət arasında münasibətlərin normallaşması istiqamətində cəhdlərin edildiyi bir vaxtda Ermənistan XİN-in xalqlararası nifaqı təşviq edən bəyanatla çıxış etməsi bir tərəfdən bu ölkənin məsuliyyətsiz davranışını, digər tərəfdən isə baş verən son hadisələrdən hələ də dərs çıxarmadığını göstərir.

Ermənistan XİN-in nəzərinə çatdırırıq ki, belə bir destruktiv yanaşmanın heç bir gələcəyi yoxdur”.

Azərbaycandan AVRONEST Parlament Assambleyasının komitə iclaslarında iştirak etmək üçün İrəvana gedəcək deputatların adları açıqlanıb.

Tədbirlərdə Milli Məclisin deputatları, AVRONEST PA-da Azərbaycan nümayəndə heyətinin üzvləri Tahir Mirkişili və Soltan Məmmədov iştirak edəcəklər.

Deputatlar iclaslarda müzakirə olunacaq məsələlərə Azərbaycan tərəfinin mövqeyini bildirəcəklər.

Qeyd edək ki, səfər fevralın 22-də baş tutacaq.

Türk əsilli ABŞ alimi, kimya üzrə Nobel mükafatı laureatı Əziz Sancar artıq öz araşdırmalarını Türkiyədə aparacaq.

Qeyd edək ki, professor hazırda xərçəngin müalicəsi sahəsində tədqiqat fəaliyyəti ilə məşğuldur.

Ə.Sancar Türkiyə Təhsil Nazirliyinin dəvəti ilə onun adını daşıyan Təhsil Mərkəzinin açılış mərasimində iştirak etmək üçün Ankaraya gəlib.

Tədbirdə çıxış edən alim yeni araşdırmasından danışıb.

“Türkiyəyə gəlməmişdən bir gün əvvəl mühüm bir kəşf etdik. Bu, elmə əsaslan, əsaslı tədqiqat üsuludur. O, xərçəngi birbaşa müalicə etməsə də, tibb dünyası üçün mühüm kəşfdir.

Xərçəng xəstəliyinin müalicəsi barədə danışan alim bildirib ki, bu sahədə aparılan bütün işlər xəstəliklə mübarizəyə yönəlib.

“Bu iş DNT-nin bərpası ilə bağlıdır, bu yeni üsuldur və mən fəaliyyətimi Türkiyəyə köçürmək fikrindəyəm”, - deyə Nobel mükafatı vurğulayıb.

Mənbə: TRT

Təhsil naziri Emin Əmrullayev təhsil müəssisələri və direktorlarla bağlı yayılan neqativ görüntülər barədə danışıb. 

Bu barədə jurnalistlərə açıqlama verib.

“Nöqsanlara yol verən direktorlar vəzifəsindən azad edilir”.

O qeyd edib ki, partanın üzərinə çıxan uşaqların bu cür hərəkətləri problemdir:

“Amma bu, məktəbdaxili problemdir. İki insan arasında olan münaqişəni ölkənin ən vacib gündəminə çevirməkdə böyük bir fayda görmürəm”.

“Türkiyə Silahlı Qüvvələrinin bir tərəfdən sərhəd təhlükəsizliyi fəaliyyətini, digər tərəfdən terrorla mübarizəni qətiyyətlə davam etdirir”.

Bu barədə Türkiyə milli müdafiə naziri Hulusi Akar NATO Müdafiə Nazirləri Toplantısından sonra Brüsseldə türkiyəli jurnalistlərlə görüşündə deyib.

O bildirib ki, Türkiyə Azərbaycana bu istiqamətdə dəstəyini davam etdirir:

“Liviya, Azərbaycan kimi dost və qardaş ölkələrdəki dostlarımızın, qardaşlarımızın haqlı mübarizələrini bacardığımız qədər dəstəkləməyə davam etdiririk”.

Keçirdiyi görüşlərdə Cənubi Qafqazda regional əməkdaşlığın hər kəsin xeyrinə olduğunu deyən Akar belə davam edib: “Biz İŞİD, Əl-Qaidə, PKK-dan heç bir fərqi olmayan YPG və FETÖ kimi hər cür terrora qarşı mübarizə aparırıq. Bunu davam etdirdiyimizi, müttəfiqlərimizdən bu sahədə daha çox əməkdaşlıq gözlədiyimizi də həmsöhbətlərimizə bildirdik”.

Prezident İlham Əliyev Azərbaycan Respublikası vətəndaşlarının 2022-ci il aprelin 1-dən 30-dək müddətli həqiqi hərbi xidmətə çağırılması və müddətli həqiqi hərbi xidmət hərbi qulluqçularının ehtiyata buraxılması haqqında sərəncam imzalayıb. 

Bununla bağlı Prezident.az məlumat yayıb. 

Sərəncama əsasən, 2004-cü ildə doğulmuş və çağırış gününədək (həmin gün də daxil olmaqla) 18 yaşı tamam olmuş, habelə 1987–2003-cü illərdə doğulmuş, yaşı 35-dək olan, Azərbaycan Respublikasının Silahlı Qüvvələrində müddətli həqiqi hərbi xidmət keçməmiş, müddətli həqiqi hərbi xidmətə çağırışdan möhlət hüququ olmayan və ya müddətli həqiqi hərbi xidmətə çağırışdan azad edilməmiş Azərbaycan Respublikası vətəndaşları 2022-ci il aprelin 1-dən 30-dək müddətli həqiqi hərbi xidmətə çağırılacaqlar. 

Həmçinin, “Hərbi vəzifə və hərbi xidmət haqqında” Azərbaycan Respublikası Qanununun 38.1.1-ci maddəsində nəzərdə tutulmuş xidmət müddətini keçmiş müddətli həqiqi hərbi xidmət hərbi qulluqçuları 2022-ci il aprelin 1-dən 30-dək ehtiyata buraxılacaqlar. 

Prezident İlham Əliyev üç yeni icra başçısı təyin edib.